አባ መቃርዮስ ሊቀ ጳጳስ ዘኢየሩሳሌም ወአውስትራልያ ወዘኵሎን አድያሚሃ
ABBA MEKARIOS ARCHBISHOP OF THE DIOCESE OF JERUSALEM AND AUSTRALIA
በስመ አብ ወወልድ ወመንፈስ ቅዱስ አሐዱ አምላክ አሜን!
ክብር ለእግዚአብሔር በአርያም ሰላምም በምድር ይሁን ሉቃስ 2፤14
ለተወደዳችሁ በአውስትራልያና በመላው ዓለም ለምትገኙ የኢትዮጵያ ኦርቶዶክስ ተዋህዶ ቤተክርስቲያን ካህናትና ምዕመናን! እንኳን ለጌታችን ለአምላካችንንና ለመድኃኒታችን ለኢየሱስ ክርስቶስ በዓለ ልደት በሰላም አደረሳችሁ።
የጌታችን የመድኃኒታችን የኢየሱስ ክርስቶስ ልደት ሰውና እግዚአብሔር የተገናኙበት፤ ትንቢተ ነቢያት የተፈጸመበት፤ እርቅና ሰላም የተሰበከበት ምድራውያንና ሰማያውያን ፍጥረታት በአንድ ላይ እግዚአብሔርን ያመሰገኑበት፤ በዓል ነው።
በዚህ ቀን የሩቅ ምሥራቅ ነገሥታት በኮከብ እየተመሩ በመምጣት ለተወለደው ንጉሥ ወርቅ ዕጣን ከርቤ እጅ መንሻ አቅርበዋል። ወርቅ ለመንግሥቱ፤ ዕጣን ለክህነቱ፤ ከርቤ ማኅየዊ ለሆነ ሞቱ ምሳሌ እንደሆነ ሊቃውንት ይተረጉማሉ::